Од вчера у Керестуре знова двоме лїкаре

автор маф
1k Опатрене

РУСКИ КЕРЕСТУР – Як прешлого тижня було и наявене, у Здравственей амбуланти у Руским Керестуре од вчера почал робиц и други лїкар общей пракси, бо попри специялистки общей медицини др Златани Надь, почала робиц и др Александра Уґлєшич.

Амбуланта знова роби од 7 до 19 годзин и з тим вироятно вецей нє будзе таки вельки гужви, понеже остатнї два мешаци шицка робота була на др Надьовей.

Як за Рутенпрес виявел директор Дому здравя Кула др Жарко Шевин, други лїкар общей пракси за керестурску амбуланту на нєодредзени час обезпечени прейґ розписаного конкурсу.

Як то по терашнїх предписаньох, кулски Дом здравя ище пред нєдостатком лїкара у Керестуре достал дошлєбодзенє ресорного министерства за анґажованє єдного специялисти ґинеколоґ, алє тото дошлєбодзенє вихаснованє за ришенє проблему у Руским Керестуре, односно анґажованє лїкара общей пракси.

ПОВЯЗАНИ ТЕКСТИ