Од вше ма два доми

автор сен
1.3k Опатрене

– Нє раз ми дзепоєдни гуторели: – „Добре тебе, там шицко супер, єдноставно функционує”. Поправдзе, кед нє маш мотивацию, нїхто це нє одвеже на факултет, нє положи испит и нє будзе робиц 60-70 годзини тижньово место тебе. Єдноставно, за успих ше треба потрудзиц, нє важне дзе ши одроснул и дзе жиєш – поручує Сашо Сопка, єден з наших успишних медицинских фаховцох.

Доктор медицини Сашо Сопка, началнїк оддзелєня Анестезиолоґиї и интензивного допатраня Универзитетскей клинїки у Ахену у Нємецкей, як доцент преподава студентом медицини и роби науково-виглєдовацки роботи. Його родичи тераз жию у Керестуре, а Сашо приходзи до нїх кед ма часу. Праве початком юлия видвоєл даскельо днї и пришол до Сербиї, насампредз ґу родичом, алє вихасновал нагоду пойсц и до Нового Саду на „Еґзит”, та до Беоґраду.

ИНТЕРНАЦИОНАЛНИ ШКОЛЯР

Сашо народзени у Нємецкей, дзе жил 12 роки у малим месце Кемпен, при Дизелдорфу. Потим зоз родичами пришол до Руского Керестура, дзе закончел основну школу и ходзел до Ґимназиї „Петро Кузмяк”, цо и обачиц понеже барз добре бешедує по руски, прецо є подзековни професорови Владимирови Бесерминьови.

– Тоти роки у Керестуре ми барз значели, бо сом ше ту социялизовал, а и хибело ми правилно научиц руски язик. Шицки людзе дзешка народзени, там одрошню и жию, а я вше мал такповесц два доми – Нємецку и Сербию, т.є. и Руски Керестур – гвари Сашо.

По законченю ґимназиї Сашо пошол студирац медицину до Ахену, варошу на тромеджи медзи Нємецку, Белґию и Голандию, и там остал. Як гвари, Ахен интернационални варош и праве прето ше му пачи. Спомедзи 250 000 жительох, ма вецей як 35 000 студентох, прецо го наволую и студентски варош.

ДОХТОР МУШИ БУЦ ДОБРИ КОМУНИКАТОР, ПСИХОЛОҐ И МЕНАДЖЕР

Медицина го интересовала од младосци, та, як гвари, требало ше на час заозбилїц и почац учиц. У основней школи бул барз успишни, алє попущел у штреднєй школи,

односно у „критичних” рокох. На щесце, на час похопел же кед ше нє будзе учиц, нє годзен уписац жадани факултет. – Студиї медицини тирваю шейсц роки, а потим ше идзе на специялизацию, хтора тирва пейц роки. Интересантне же аж и за дохтора общей медицини треба закончиц специялизацию. Гоч випатра же то длуго, треба часу же би ше студента порихтало за векшину ситуацийох хтори го знайду, а дацо ше, заш лєм, учи през искуство. Я специялизовал анестезиолоґию и интензивне допатранє и моя робота вимага психичну и емоцийну стабилносц, понеже ше поряднє стретам зоз ситуацию дзе треба, у догварки зоз фамелию пациєнта, одлучиц чи вон будзе жиц, чи нє. Окрем пририхтованя наркози, робим интензивне допатранє, урґентну медицину и медицину болю – специялну дисциплину дзе ше лїчи людзох зоз хронїчнима болями похребцини, ставцох, глави… Окрем знаня и искуства у медицини, заключел сом же добри дохтор муши буц добри комуникатор, психолоґ и менаджер, а понеже маме досц информованих пациєнтох, я як доцент учим студентох же би зоз пациєнтами бешедовали на єднаким уровню – толкує Сашо.

22-23 Saso SopkaУ Нємецкей ясна улога дохтора у дружтве, та спрам того и плаца добра. Медзитим, дохторе углавним робя у шпитальох, у настави, а ґу тому робя и науково виглєдованя, цо вимага вельо часу и пошвеценосци.

– Понеже робим у универзитетскей клинїки, держава ме обовязує же бим окрем роботи зоз пациєнтами, ище минимум 2-4 годзини тримал наставу, а вец пишем и науково-виглєдовацки роботи.  Нїґда сом ше нє питал чи то шицко мушим робиц, понеже комбинация – робиц на клинїки, тримац наставу и сам ше учиц, стретнуц и остац у контакту з людзми з рижних державох, чуц други думаня, за мнє идеална робота – гвари Сашо.

ТРЕБА НАЙСЦ ЧАСУ И ЗА СЕБЕ

Уж седем роки Сашо сотрудзує зоз Медицинским факултетом на Гарварду, та там поряднє ходзи на конференциї.

– Першираз сом пошол як студент, на кратки курс, и сотруднїцтво ше предлужело. Я ше найбаржей занїмам з тему хтора у медицини ище млада, а то дидактика у медицини, цо на даяки способ и педаґоґийна обласц, понеже ше роби о методох и принципох ученя и триманя настави. Тота тема ме водзи на медзинародни конференциї, та окрем у европских жемох, були зме у Австралиї, Малезиї и Синґапуру. Шицко то крашнє звучи, алє ми, котри участвуєме на конференцийох, найчастейше видзиме лєм аеродром, готел и конференцийни центер. Тераз уж и мнє пришло же, уж кед мам нагоду раз у живоце пойсц до даякей держави, жадам вихасновац и видзиц дацо – приповеда Сашо.

Викенди часто резервовани за дежурства у шпиталю, конференциї, а понеже ше до тижня роби 60, а нє раз и 70 годзини, нє остава часу за виходи, та, як нам виволал наш собешеднїк, дакеди ужива лєм шедзиц дома.

– Любим людзох и комуникацию, алє наисце ми придзе же бим мал дас два годзини у тижню, так еґоїстично, лєм за себе. Велї людзе нательо пошвецени роботи же нє беру часу за себе и, гвари ше же найгорши пациєнти то людзе котри робя у обласци медицини – гвари Сашо.

И НЄМЦИ ОДХОДЗА ДО ИНОЖЕМСТВА

Нємецку ше децениями трима за єдну зоз жемох хтори обезпечую добри живот за своїх жительох, а остатнїх рокох актуални одход наших медицинских роботнїкох до тей жеми. Тото цо за наших людзох рай, за домашнїх трапеза, та ше велї опредзелюю за одход до иножемства.

– Велї роботнїки у обласци медицини достали одкази. Можем повесц же Нємецка ма добру здравствену систему, алє пре ню церпи медицински персонал. Велька фрустрация нємецких роботнїкох, прето же ше од шицких обчекує же би шицко дали за медицину и робели вецей як предвидзене, цо нє случай у даєдних других державох. Прето ше велї опредзелюю за роботу фармацийней индустриї, лєбо одходза до иножемства – найчастейше Швайцарскей, Велькей Британиї и Америки, дзе ше менєй роби за векши пенєж – толкує наш сообешеднїк.

Кажда держава ма иншаку систему здравства, та ше на тот способ и зочує зоз специфичнима проблемами. Держава у розвою, дзе спада и Сербия, чежко може обезпечиц одвитуюцу инфраструкту, хтора барз драга. Нє раз ше поведло же би у Войводини направиц даскельо „Каменїци” же би лїстини чеканя нє исновали.

– Лїстини чеканя постоя и у Нємецкей, алє на иншаким уровню. У нашим шпиталю маме три маґнетни резонанци, и у кругу од 10 километри сиґурно єст ище єдна, лєбо два, а заш лєм ше чека по три мешаци на зарйованє. Маме специфичну систему, дзе ше пациєнти дзеля на приватних и державних. Осиґурани мож буц у державним и приватним фонду, а до приватного мож дойсц лєм кед приманя прейду одредзену суму. Прето людзе гваря же чувствовац „двокласну” медицину – гвари Сашо.

22-23 Saso Sopka Klinika Aachen

Нємецкей шлєбодно мож приписац прикменїк мултикултурна держава, медзитим за роботу ше подрозумює, окрем фахового знаня, и знанє нємецкого язика.

– Думам же Нємецка ма потреби и за високошколованим кадром. Роботнїки зоз Сербиї добре квалификовани, пошвецени и мотивовани, та их прето Нємци ценя. Ґу тому, порихтани су робиц за пенєж яки ше там понука. Мам єдного колеґу котри студирал у Беоґрадзе, а у Нємецкей му нє припознавали дзепоєдни предмети, та мушел „страциц” дас два роки на покладанє тих предметох цо му хибели. За доставанє роботи ше углавним нє чека конкурс, алє треба ше особнє понукнуц и нє одуставац – дакеди ше гоч и два раз културно питац, цо роботодавателє ценя – толкує вон.

УНИВЕРЗИТЕТСКИ ШПИТАЛЬ

Медицински факултет у Ахену спада под Универзитет „Висока технїчна школа” (RWTH Aachen), хтори ма коло 35 000 студентох и спада до єдного з найвекших универзитетох у Нємецкей. Сашо роби на Универзитетским шпиталю хтори, пре специфични випатрунок, волаю Фабрика. У єй рамикох и Медицински факултет, та студенти кажди дзень стретаю пациєнтох и у контакту су з нїма. Шпиталь други по поверхносци у Европи и єден з найвекших центрох за трансплантацию печинки.

ПОВЯЗАНИ ТЕКСТИ