КУЛА – У Кули нєшка почина 57. Републични фестивал аматерских театрох, а тирва по соботу, 27. юний. Фестивал почнє з отвераньом вистави малюнкох Павла Блесича зоз Зомбора у Подобовей ґалериї Културного центру (КЦ) на 19 годзин, на 19,30 г. будзе запалєни традицийни Фестивалски огень опрез КЦ, а заставу Фестивалу подзвигнє ґлумец-аматер Ранко Шпанєвич з Крущичу.
На шветочним отвераню на 20 г. у сали КЦ наступи познати ґлумец Раде Маркович з Беоґраду, а Фестивал отвори предсидателька Скупштини општини Кула Снежана Мркаич. Першу представу – „Любовен писмо” Кости Трифковича, у режиї Драґана Остоїча, виведу домашнї з КЦ Кула.
У конкуренциї за награди участвую 8 представи – з Прокупля, Ґорнього Милановцу, Беоґраду, Смедеревскей Паланки, Старей Пазови и копродукцийна представа аматерох з Боґатичу и Прнявору. Медзи нїма аж два представи драмских аматерох з кулскей општини, бо попри спомнутого кулского Културного центру, на пияток, 26. юния, на Фестивалє наступя драмски аматере з КУД „Крущич” з Крущичу, з ансамбл-представу „Велька драма” Синиши Ковачевича, у режиї Деяна Цицмиловича. Представи у сали КЦ Кула починаю на 20 годзин.
После преглашованя побиднїкох, на соботу, 27. юния, як госци участвую студенти Драмского одсеку Факултету уметносцох з Приштини, з представу Биляни Срблянович „Фамелийни приповедки”, у режиї Милана Плечаша и Неманї Савковича.
Пририхтана и провадзаца програма, а єдно зоз збуваньох, на ютре на 18,30 г. у Малей сали КЦ, будзе „Панонски канцониєр”, на хторим наступя найлєпши рецитаторе з местох кулскей општини котри того року участвовали, у двох катеґорийох аж и победзели, на Републичней смотри рецитаторох у Валєве.
Орґанизатор и домашнї Фестивалу Союз аматерох Сербиї, Културно-просвитна заєднїца Општини Кула, Општина Кула и кулски КЦ.