МЕДЗИЛАБОРЦИ (СЛОВАЦКА) – У исти час кед у нас будзе Фестивал рускей култури „Червена ружа”, у Медзилаборцох, у Словацкей, будзе отримани 54. Русински фестивал култури и спорту. Фестивал почнє на ютре, 24., а будзе заварти на нєдзелю, 26. юния.
На ютре опрез Музею модерней уметносци Ендия Варголи будзе Русински концерт, а под час Фестивалу, на будинку спомнутого музею ютре будзе одкрита спомин-плоча з нагоди 25-рочнїци отримованя Першого Шветового конґресу РРЛ, праве у Медзилаборцох.
Ютре на програмох Фестивалу наступя познати музични шпиваче и ансамбли, медзи нїма и трио Маґурово и Иґор Куцер, а на соботу будзе Репрезентативни концерт дзецинских музично-танєчних ансамблох, та перша часц спортских змаганьох.
На турнире у фодбалє, хтори будзе на нєдзелю, змагаю ше фодбалски клуби з Медзилабороцох, Снїни, Вранова над Тополю и Стропкова, а у културней часци нєдзельовей програми будзе Ґала-концерт, на хторим наступя музично-фолклорни анасамбли Русинох зоз Слоавцкей, як и госци з України.
Русински фестивал култури и спорту орґанизую Место Медзилаборци и Русинска оброда Словацкей, з финансийну потримовку Програми „Култура народносних меншинох” Влади Словацкей и Прешовского самоуправного краю, а под покровительством ополномоцнїка за национални меншини Влади Словацкей Ласла Буковского.