РУСКИ КЕРЕСТУР – Од пондзелку 9. мая, почина упис до ПУ „Бамби” Кула, та и до дзецинскей заградки/Оддзелєня „Цицибан” у Руским Керестуре. Уписує ше дзеци до цалодньового и полдньового пребуваня, а упис тирва по 29. май. У Керестуре дзецко мож уписац кажди роботни дзень од 12 до 13 годзин.
До полдньового пребуваня ше уписує дзеци народзени 2010. и 2011. року, а до предшколскей ґрупи буду уписани дзеци народзени од 1. марца по конєц 2010., и у януару и фебруару 2011. року.
До цалодньового пребуваня мож уписац дзеци од єдного по седем роки, а на упис родичи треба же би приведли и дзецко котре уписую.
З документациї за упис потребне кресцене писмо дзецка (вивод з матичней кнїжки народзених), а за предшколски дзеци и доказ о його здравственим препатрунку.
За специфични ґрупи дзецох – самохраних родичох, дзеци з хранительских фамелийох, лєбо установох социялней защити, як и хасновательох пенєжней социялней помоци, потребни и документи о таким статусу.
Подробнєйши информациї о документациї мож най на огласней табли у будинку керестурскей дзецинскей заградки.