Од ютра акция Школски прибор, а почина робиц и Дзецински куцик

автор маф
1k Опатрене

РУСКИ КЕРЕСТУР – Парохийни Каритас церкви св. оца Миколая у Руским Керестуре и на початку того школского року орґанизує акцию Школски прибор, а од ютра, 9. септембра почина робиц и каритасов Дзецински куцик.

З традицийну акцию Каритас ше намага помогнуц фамелийом у потреби хтори маю школски дзеци же би их лєгчейше опремели зоз школским прибором. За тоту намену заинтересовани можу дац свой пенєжни прилог або подаровац половни школски прибор.

Прилоги мож однєсц до парохийного уряду кажди роботни дзень до поладня, або вовторками вечар до просторийох Каритасу. Волонтере обчекую же ше з тоту акцию годно помогнуц коло 15 фамелийом.

Од ютра, 9. септембра, предлужує робиц и Дзецински куцик хтори ше у Каритасових просторийох уж вецей роки отримує пиятками, од 20 по 21,30 годзин.

До куцику поволани дзеци основношколского возросту, од першей по осму класу, а волонтере за нїх пририхтую рижни интересантни змисти.

 

ПОВЯЗАНИ ТЕКСТИ