НОВИ САД – Тогорочна манифестация Днї Миколи М. Кочиша, хтору орґанизує Дружтво за руски язик, литературу и културу, почина на ютре, 1. децембра у Новим Садзе, а рижни програми у єй рамикох буду по 18. децембер.
Манифестация на штварток почнє на 12 годзин з кладзеньом квеца на гроб М. М. Кочиша, а тиж и Меланиї Павлович и Яшу Бакова на Городским теметове у Новим Садзе. Исти дзень на 18 годзин у Ґалериї Дружтва писательох Войводини будзе отворена вистава подобових роботох у енкаустики Сонї Папуґа Андєлич „Шлїди”.
Програма Дньох М. М. Кочиша будзе предлужена 4. децембра у Ґосподїнцох з подобову виставу Гелени Фейди Крклюш, а потим програми буду у Новим Садзе, Новим Орахове и у Кули.