СЕРБИЯ – Од 9. по 18. май у рамикох манифестациї „Музеї Сербиї дзешец днї од 10 до 10“ годно безплатно нащивиц коло 60 музеї и други културни установи. Иницияторе манифестациї директоре националних музейох котри гражданом сцу приблїжиц їх змисти и указац на богатство и вредносци културних установох.
Безплатни програми буду отримани на вєдно 110 локацийох, хтори облапя вистави и провадзаци активносци, як цо то презентациї, роботнї и явни трибини.
Як саме мено манифестациї гутори, будзе отворена од 10 до 22 годзин, а понеже єй отримованє залапює три значни датуми – 9. май – Дзень побиди, 16. май – Европску ноц музейох и 18. май – Медзинародни дзень музейох, орґанизаторе наявели же буду означени на окремни способ.
До Манифестациї ше уключує и 21 културна институция з Войводини и то з Нового Саду, Сримскей Митровици, Шиду, Суботици, Вербасу, Вершцу, Зренянину, Панчева, Билей Церкви и Идвору.