НОВИ САД – Тогорочни Дванасти Руски фестивал малих сценских формох ”Дюра Папгаргаї” почина на ютре, 5. децембра, а тирва по нєдзелю, 7. децембра.
Фестивал и того року будзе у Ґимназиї ”Лаза Костич” у Новим Садзе (улїца Лази Лазаревича ч. 1), а буду виведзени 6 представи ансамблох и поєдинцох з наших местох, дзе и єдна монодрама и єдна стенд-ап комедия. Першираз на тим Фестивалє наступи и наш национални Руски народни театер ”Петро Ризнич Дядя”.
Фестивал на ютре почнє на 19 г. з отвераньом вистави малюнкох з Подобовей колониї Месного одбору Рускей матки и Етно-клубу ”Одняте од забуца” з Коцура, наступом Националного оркестру и представяньом зборнїку драмских текстох з дотерашнїх Фестивалох з назву ”Масонка”. У сотруднїцтве з орґанизатором Фестивалу, зборнїк видала НВУ ”Руске слово”.
Перша представа на тогорчним Фестивалє будзе ”На терапиї у Милеви”, хтору написала, режирала и ґлуми у нєй основношколка з Коцура Катарина Фейди. Представа витворена у продукциї КПД ”ДОК” з Коцура.
На соботу буду виведзени два, на нєдзелю ище три представи (єдна за другу), а початок першей на 19 годзин. Цали репертоар Фестивалу мож опатриц на правим боку Рутенпресу.
Фестивал змагательни, та на нєдзелю буду преглашени три найлєпши представи по думаню публики, а орґанизатор Фестивалу Матка-Дружтво Руснацох Нового Саду-Войводини.