БЕОҐРАД – Заняти у явним секторе од януара буду доставац векши плаци, а забрана анґажованя нових роботнїкох будзе предлужена аж по конєц 2017. року, предвидзене з вименками Закона о буджетскей системи хтори ше пошвидко найдзе пред посланїками Скупштини Сербиї.
Як уж наявйоване, предложене же би найвекше звекшанє плацох – за шейсц одсто, достали заняти у предшколских установох, основних и штреднїх школох. За пейц одсто буду звекшани плаци у полициї, войску, правосудству, науково-виглєдовацкей дїялносци, установох култури, социялней и здравственей защити. Найменше звекшанє плацох, за три одсто, достаню заняти у високошколских установох.
Вименки Закона о буджетскей системи предвидзую и звекшанє пензийох за 1,5 одсто. Як пише Бета, оценює ше же за звекшанє плацох и пензийох у 2017. року з буджету треба видвоїц коло 18 милиярди динари.
Влада Сербиї предложела же би ше забрану анґажованя нових роботнїкох, хтора запровадзена у децембру 2013. року, предлужело по конєц 2017. року, бо ше указало же контроловане анґажованє нових роботнїкох допринєсло фискалному стабилизованю.