БЕОҐРАД – По Законє о планованю и вибудови, хтори прилапени концом прешлого рока, дозволи за будованє буду мушиц буц покончени за мешац од придаваня вимоги и проєкту. Як наявене, то за гражданох будзе значиц и же буду мац менєй конченя у администациї.
Шицки локални самоуправи муша мац єден шалтер, односно сектор, дзе ше гражданє годни информовац о процесу доставаня дозволи и на хторим годни достац потребну помоц.
Процедура доставаня будзе єдноставнєйша, з тим же граждан ма придац лєм вимогу и проєкт, а шицки согласносци буду зазберовац службенїки, а нє як цо то було дотераз – же граждан мушел ходзиц до даскельо институцийох пре набавянє потребних документох.
– До 1. марца шицки локални самоуправи у Сербиї муша цалком почац применьовац Закон о планованю и вибудови и видавац дозволи найдлужей за мешац – виявела министерка будовательства, транспорту и инфаструктури Зорана Михайлович.
Вона наявела и же будзе направени реґистер локалних самоуправох, дзе ше их будзе ранґировац на основи швидкосци видаваня дозволох, цо значне за прицагованє потенциялних инвеститорох. До конца рока, ресорне министерство планує увесц и електронски будовательни дозволи.