КОЦУР – После одредзеней павзи и зменшаних активносцох, члени и аматере Културно-уметнїцкого дружтва (КУД) „Жатва” з Коцура вчера вечар отримали схадзку, на хторей розпатрани плани и можлївосци з хторима ше пробує консолидовац роботу Дружтва.
КУД „Жатва” того року обчекує и Виберанкова скупштина, понеже терашньому Управному одбору виходзи пейцрочни мандат. Як поведзене на вчерайшей схадзки, аматере муша предложиц нови тим хтори будзе управяц з Дружтвом и вибрац нового предсидателя, бо дотерашня предсидателька Танита Ходак, пре професийни причини, ище скорей дала задзекованє на тоту функцию.
Вчера бешедоване о роботи секцийох Дружтва и повторним порушованю и обнавяню їх активносцох, а найвецей о Дзецинскей шпивацкей секциї, Мадярскей шпивацкей секциї, оркестру и Фолклорней секциї. Тиж розпатрани и идеї за нови секциї и активносци у КУД.
Подпредсидатель Националного совиту (НС) Руснацох Микола Шанта присутних поинформовал же Совит за оправянє простору за будуце шедзиско Подручней канцелариї НС у Коцуре (Руски дом) опредзелєл ище 300 000 динари, як и же старосц о реновираню тераз превжал НС, односно предсидатель його Вивершного одбору Желько Ковач.