У Оддзелєню за урбанизем Општинскей управи у Шидзе, у тей хвильки єст коло 400 предмети за леґализацию будинкох хтори придати по старим законє, а после ступаня на моц нового Закону о озаконьованю безправно збудованих будинкох 1. децембра 2015. року, вони буду ришовани по нових предписаньох.
Руководитель Оддзелєня за урбанизем Општинскей управи Бранко Секулич поволує гражданох хтори маю безправно збудовани будинки же би поднєсли вимоги за их леґализованє.
– З вимогу треба придац и одредзени докази, а на першим месце то питанє маєтних одношеньох, або маєтного стану будинка и жеми (парцели) на хторей є збудовани. Ту ше дума на тото же чи будинок власносц странки, чи совласносц, чи є у закупу. После того тиж треба придац звит о стану будинку зоз елаборатом ґеодетских роботох и тей хвильки тот документ треба придац у чаше од 60 днї од подношеня вимоги. При самим концу поступку кед леґализация дошлєбодзена, вец странка уплацує одвитуюцу таксу – надпомина Бранко Секулич.
Вон додава же ше таксу плаци на хижи и квартелї и помоцни економски будинки поверхносци до 100 квадратни метери, 5 000 динари. Од 100 до 200 квадрати ше плаци 15 000 динари, од 200 до 300 квадрати 20 000 динари, а за вецей як 300 квадратни метери плаци ше 50 000 динари. Тиж так, кед у питаню, наприклад, квартелї за тарґовище и кед поверхносц до 500 квадратни метери, такса виноши 250 000 динари, а од 500 до 1 000 квадратни метери такса виноши 500 000 динари. Кед слово о подношительох вимоги хтори у стану социялней потреби, або о „самохраним” родительови, цо ше сам стара о себе, лєбо особи з инвалидитетом, вец вони ошлєбодзени од плецаня такси.
Бранко Секулич, руководитель Оддзелєня за урбанизем Општинскей управи у Шидзе
За нови вимоги, после ступаня нового закону на моц, Секулич гвари же поступок иншаки як цо бул скорей.
– Странка у тим случаю обвисцує будовательного инспектора хтори виходзи на терен и утвердзує факти о будинку, потим приноши ришенє о валяню такого будинку хторе ше нє запровадзує, алє ше доручує до нашого оддзелєня и вец ми по службеней длужносци порушаме поступок и обвисцуєме странку хтори докази-документи муши принєсц. И на концу поступку, кед же ше леґализация запровадзи, странка виплаци таксу – наглашує Бранко Секулич.
Општинска управа направела и план попису процивзаконїто збудованих будинкох з хторим прецизовани поступок и способ пописованя будинкох. Пописовац будзе будовательни инспектор и одвитуюци овласцени особи. По плану попису, од януара по конєц мая буду евидентовани будинки у Шидзе. У юнию буду контроловани Вашица, Илинци и Батровци, а у юлию Адашевци и Морович. У авґусту плановане нащивиц Вишнїчево и Ямену, а у септембру Ґибарац, Бачинци и Куковци. Контролованє у октобру будзе у Люби, Ердевику, Бинґули и Дїпши, а закончи ше у новембру у Беркасове, Бикичу, Соту, Привиней Ґлави и Моловинє.
ХАСЕН З ЛЕҐАЛИЗАЦИЇ
Бранко Секулич гвари же од такси хтору плаци подношитель вимоги, 70 одсто идзе до буджету локалней самоуправи, а по 15 одсто до буджета АП Войводини и Републики Сербиї. Медзитим, окрем єднократного хасну, дружтвена заєднїца будзе мац и тирваци хасен прето же з леґализацию будинкох, вони тераз буду у „леґалних цекох” и на нїх ше тирвацо будзе наплацовац порцию на маєток.
ЛЕҐАЛИЗУЄ ХИЖУ И ВИКЕНДИЦУ
– Добре же тот закон принєшени и тераз мам леґализовац два будинки. Слово о меншей хижи у дворе хтора збудована пред вецей децениями, а тиж мам леґализовац и викендицу хтора збудована на месце старей колїби у винїци, хтора мала лєм шейсц квадратни метери. Познате ми же так було и у Горватскей кед ше пририхтовали войсц до Европскей униї и добре же би и у нас так було – гвари єден пензионер зоз Шиду хтори жадал остац анонимни.