ЖАБЕЛЬ/ДЮРДЬОВ/ҐОСПОДЇНЦИ – Означованє рочнїци и здогадованє на жертви Рациї мадярского войска котра у Южней Бачки почала 4. януара 1942. року, прешлого тижня святочно означени у шицких местох општини Жабель.
На дзень Рациї у Дюрдьове, котра ше случела 9. януара пред 77 роками, на исти дзень прешлей стреди отримана панахида опрез будинку валалскей Основней школи „Йован Йованович Змай” дзе ше находзи спомин плоча. Панахиду служел православни священїк о. Петар Дюкич, а о нємилих случованьох и рухох мадярского окупатора над Дюрдьовчанями того дня гуторела Душанка Джамбас, предсидателька Совиту Месней заєднїци Дюрдьов. Потим школяре валалскей школи пречитали стихи на тоту тему, а чолнїки општинскей власци поставели венєц на спомин плочу.
Здогадованє на жертви Рациї означени и у Ґосподїнцох опрез будинка валалскей Основней школи „Жарко Зренянин” дзе ше находзи памятнїк, як и у Жаблю и Чуроґу дзе панахиду служели тамтейши православни священїки, а представителє општинскей и валалскей власци здогадли на подїї котри у Рациї преживйовали їх валалчанє и на памятнїки покладли венци.