МИКЛОШЕВЦИ – Всоботу, 8. октобра, у Миклошевцох означена 25-рочнїца страданя и виганяня жительох Миклошевцох у войнових збуваньох 90-рокох, а на означованю рочнїци присуствовали числени домашнї и госци.
Означованє 25-рочнїца страданя Миклошевчанох започало на 10 годзин зоз Службу Божу за шицких настраданих, хтору у грекокатолїцкей церкви Рождества Пресвятей Богородици на руским и горватским язику служели парох миклошевски и викар славонско-сримски о. Яким Симунович и римокатолїцки парох з Берки о. Крешимир Арачич. По Служби, при памятнїку у центре валалу, после интонованя державней гимни и шветочней шпиванки Руснацох у Горватскей, з минуту цихосци дата чесц погинутим особом.
На тей комеморативней шветочносци, хтора отримана на швето Нєзависносци Републики Горватскей, предсидатель Месного одбору Миклошевци Дюра Бики начишлєл мена шицких настраданих особох з того часу и здогаднул на їх нємилу судьбу, на хтору ше, як гварел – нє шме забуц.
Венци и швички опрез памятнїку положели терашнї министер привреди у Технїчней влади Горватскей Томислав Паненич (пред тим началнїк Општини Томповци), предсидатель Жупанийскей скупштини Вуковарско-сримскей жупаниї Антун Жаґар, зоз сотруднїками, заменїки началнїка Општини Томповци Здравко Звонарич и Мирослав Лїкар, члени Месного одбору Миклошевци, Здруженя женох, Здруженя рибарох „Леняк”, як и школяре Подручней школи, на чолє з директорку др Ана-Марию Зулич.
З пригоднима словами присутним бешедовали министер Паненич и предсидатель Жупанийскей скупштини Жаґар, а потим отримана заєднїцка молитва, хтору предводзели священїки о. Симунович и о. Арачич.
Означованє 25-рочнїца страданя и виганяня жительох Миклошевцох орґанизовали Општина Томповци и Месни одбор Миклошевци.