Означене єдно з националних шветох Горватох у Сербиї

автор сен
892 Опатрене

НОВИ САД – Внєдзелю, 16. октобра, зоз Службу Божу у церкви Святого Юру у Петроварадину означени Дзень народзеня бана Йосипа Єлачича, єдно з националних шветох горватскей заєднїци у Сербиї. Єлачич жил од 1801. по 1859. рок, а народзени є праве у Петроварадину и кресцени у церкви Святого Юру.

По Служби, у амфитеатре на СПЕНС-у отримана културно-уметнїцка програма, на хторей були и представителє Републичней и Покраїнскей влади, амбасадор и конзул Републики Горватскей у Сербиї, представителє Городу Нови Сад, та Заводу за културу войводянских Горватох.

Министер за роботу, обезпечованє роботи, борецки и социялни питаня Александар Вулин з тей нагоди гварел же положенє националних меншинох у Сербиї на найвисшим уровню, з чим ше мало держави можу похвалїц.

– Вшелїяк же мушиме пестовац розлични култури, традициї и историї, прето же зме праве пре розличносци таки яки зме – визначел Вулин и додал же Сербия красна прето же єй гражданє маю таки розлични култури, историї и традициї.

Окрем Дня народзеня бана Йосипа Єлачича, горватска заєднїца у Сербиї як свойо национални швета означує ище три датуми – 19. марец – Дзень Святого Йосипа, защитнїка горватского народу, 19. юний – Дзень народзеня бискупа Ивана Антуновича и 16. децембер – Дзень вибору першого зволаня Националного совиту Горватох у Сербиї.

ПОВЯЗАНИ ТЕКСТИ