Означени Дзень ошлєбодзеня Бикичу, на ютре у Шидзе централна програма

автор влдї
1.1k Опатрене

БИКИЧ/ШИД – Зоз Службу Божу и панахаду погинутим борцом, вчера, 4. децембра означена 72-рочнїца ошлєбодзеня Бикичу у Другей шветовей войни, а богослуженя служел парох о. Владимир Еделински Миколка.

Венци на памятнїк погинутим борцом у центре валалу у мено локалней самоуправи положели началнїк Општинскей управи Ромко Папуґа и делеґация Месней заєднїци Бикич, а школяре Подручней школи „Сримски фронт“ отримали пригодни рецитал.

Вчера означени и днї ошлєбодзеня Соту, Ердевику и Моловину у Другей шветовей войни, а нєшка, 5. децембра, будзе означене ошлєбодзенє Беркасова, Люби и Привиней Глави.

Централна манифестация з нагоди Дня ошлєбодзеня Шиду и Дня општини Шид будзе на ютре, 6. децембра, а почнє на 11 г. зоз Шветочну схадзку Општинского одбору Союзу борцох народноошлєбодительней войни, а потим буду положени венци на спомин-костурнїцу погинутим борцом на городским теметове при „петокраки“, як и на спомин-плочу погинутим борцом на будинку Културно-образовного центру.

На ютре на 12,30 г. у Руским доме будзе отворена и вистава малюнкох УЛУС у Шидзе, а на 16 г. у сали Културно-образовного центру будзе Шветочна схадзка Скупштини општини Шид и Шветочна академия, на хторей ґлумица Весна Станкович виведзе монодраму „Милунка Савич“.

ПОВЯЗАНИ ТЕКСТИ