Означени Шветови дзень борби процив сиди

автор ртв/зам
1.1k Опатрене

СЕРБИЯ – И у Сербиї вчера означени Шветови дзень борби процив сиди, а як з тей нагоди сообщене з компетентних институцийох, у нашей жеми за перши тогорочни шейсц мешаци зоз ХИВ заражени 74 нови особи.

Прешлого року у Сербиї реґистровани 178 особи заражени зоз ХИВ, цо найвецей за остатнї 25 роки. Перши заражени з тим вирусом у нашей жеми реґистровани 1985. року и од теди по нєшка одкрити 3 389 особи инфиковани з ХИВ, а од сиди умарли 1 194 особи.

Державни секретар у Министерстве здравя Берислав Векич ище скорей гварел же ше инфекцию з ХИВ одкрива при младих людзох, найвецей старосци од 20 до 49 роки. У Сербиї ше лїча о трошку Републичного фонду за здравствене осиґуранє, та за терапиї хорих од сиди держава прешлого року видвоєла 935 милиони 602 625 динари.

З нагоди Шветового дня борби процив сиди вчера у вецей здравствених установох, медзи нїма и у вербаским Общим шпиталю, окончовани безплатни тестованя на ХИВ вирус и совитованя о защити.

Младеж ЯЗАС-у Нового Саду вчера означела 20-рочнїцу роботи и орґанизованя своєй першей кампанї з нагоди Шветового дня борби процив сиди, а з нагоди рочнїци у Городскей хижи орґанизована и окремна конвенция.

Шветови дзень борби процив сиди – 1. децембер – означує ше од 1988. року.

ПОВЯЗАНИ ТЕКСТИ