Означени Шветови дзень шлєбоди медийох

автор ядю
943 Опатрене

БЕОҐРАД – Шветови дзень шлєбоди медийох означени вчера, 3. мая, а новинарски здруженя у Сербиї го означели зоз акцию „Пейц минути громогласней цихосци”. Зоз таку файту акциї сцели скруциц увагу на чежке положенє новинарох у Сербиї и проблеми зоз хторима ше медиї зочую у своєй роботи.

Нєзависне здруженє новинарох Сербиї, Здруженє новинарох Сербиї и Синдикат новинарох Сербиї поволали своїх членох и занятих у медийох же би вчера од 11,55 до 12,00 престали робиц и так уключели до акциї. Як найвекши проблеми у роботи новинаре визначую нєвигодне материялне положенє и нєдостаточна защита новинарох, нєтранспарентна власнїцка структура медийох, як и хаснованє медийох за витворйованє политичних цильох.

Министер култури и информованя Иван Тасовац винчовал швето новинаром и роботнїком у медийох и визначел же Министерство и Влада Сербиї безрезервно потримую шлєбоду медийох и же ше процивя шицким формом гроженьох, прицискох и загрожованя безпечносци новинарох.

Дзень шлєбоди медийох означує ше каждого року 3. мая од 1993. року кед го преглашела Ґенерална скупштина Зєдинєних нацийох з намиру же би ше подзвигло свидомосц членїцох о важносци медийних шлєбодох.

 

ПОВЯЗАНИ ТЕКСТИ