Означени ювилеї Яшу Бакова и Спортских бавискох

автор сас
1.2k Опатрене

ДЮРДЬОВ – Всоботу, 10. децембра, у КУД „Тарас Шевченко” у Дюрдьова отримана шветочна програма з нагоди означованя двох ювилейох – 110-рочнїци народзеня визначного спортисту, олимпийца, спортского педаґоґа и писателя, родом з Дюрдьова – Йоакима Яшу Бакова и 25-рочнїци отримованя Спортских бавискох „Яша Баков” (СБ ЯБ). Пред шветочносцу, представителє СБ дали почесци и над гробом Яшу Бакова на новосадским теметове.

Присутних привитал предсидатель СБ ЯБ Иван Папуґа, а Яким Гарди пречитал биоґрафию Яшу Бакова и кратши историят наставаня спортских бавискох з його меном. На видео-биму були приказовани Баковово и фотоґрафиї зоз СБ ЯБ, од перших по прешлорочни.

О роботи Яшу Бакова як професора у першей керестурскей Ґимназиї и часох преповадзених з нїм бешедовал його бувши школяр Дюра Латяк, котри пречитал и познату Баковову писню „Гимна рускей шлєбоди, док ше на його спортске нашлїдство у Керестуре и на свойо стретнуца з Баковом здогаднул и Йоаким Грубеня.

На видео-биму приказани и документарни филм у хторим Яша Баков бешедує о своїм живоце, прихильносцох, о вежбаню и спортскей опреми хтору хасновал, о своєй драги до Япону на Олимпийни бависка 1964. року и як, шпиваюци державну гимну Япону, достал уходїцу на Олимпияду.

Терашнїм СБ ЯБ предходзели Спортки бависка „Руского слова” и после їх преставаня, по одредзеней павзи, спортисти-ентузиясти пред 25 роками 1. авґуста у Коцуре орґанизовали перши Спортски бависка „Яша Баков”, а 2012. року ушлїдзело и їх реґистрованє як Спортске здруженє Спортски бависка „Яша Баков”.

З нагоди ювилейох уручени и припознаня за доприношенє у орґанизованю СБ, хтори достали ФК „Искра” з Коцура, ФК „Русин” з Руского Керестура, програма по руски РТВ Войводини, Янко Хома и Ярослав Виславски з Руского Керестура, Звонимир Ерделї з Петровцох, з Горватскей, Здравко Бабич з Коцура, Звонимир Салаґ з Дюрдьова и Иван Папуґа з Вербасу.

Пририхтана и пригодна културно-уметнїцка програма, на хторей участвовали оркестер КУД „Тарас Шевченко”, а шестри Валентина и Тамара Салаґ одшпивали шпиванку „Ластовки”, хтору Ириней Тимко компоновал на текст Яшу Бакова.

На концу програми представена и биста Яшу Бакова у вирабяню, хторей автор млади уметнїк з Дюрдьова Иван Киш, студент на мастер студийох скулпторства. Першу часц роботи на твореню бисти финансовала Општина Жабель и Национални совит Руснацох, а док будзе закончена, будзе поставена на одвитуюце место у Бакововим родним Дюрдьове.

ПОВЯЗАНИ ТЕКСТИ