БАЧКА ПАЛАНКА – Седма манифестация з нагоди Медзинародного дня валалских женох – 15. октобра, нєшка будзе отримана у Бачкей Паланки, дзе ше зоз свою роботу представя 170 женски валалски здруженя зоз 41 општини и городох Войводини.
На манифестациї будзе участвовац и керестурске Здруженє женох „Байка”, чийо три представительки на своїм штанду презентую ручни виробки членїцох Здруженя, а „Байка” будзе представитель цалей кулскей општини.
Попри других, того року на манифестациї участвую и жени котри ше занїмаю з орґанску польопривреду.
Медзинародни дзень валалских женох ше отримує пре представянє женского валалского активизму, винїмкових схопносцох и богатей творчосц женох на валалє, як и їх порихтаносци же би ревитализовали валал и Войводину представели як можлїви економски, привредни и туристични потенциял.
Манифестацию потримує Покраїнски секретарият за привреду, обезпечованє роботи и ровноправносц полох, у сотруднїцтве з Покраїнским заводом за ровноправносц полох и домашню општину.