НАЦИОНАЛНИ СОВИТ – Як Рутенпрес дознава од Служби Националного совиту Руснацох (НС), 17. януар – националне швето Руснацох у Сербиї у подручних канцеларийох (ПК) НС по наших местох будзе означене од 15. по 18. януар. У векшини местох шедзиска ПК у просторийох културно-уметнїцких, односно културно-просвитних дружтвох.
На пияток, 15. януара, Националне швето будзе означене у ПК у Суботици на 12 годзин, у Шидзе на 17 годзин, у Коцуре, у сали Месней заєднїци на 18, а на 19 годзин у Новим Садзе.
На соботу, 16. януара, националне швето будзе означене у Вербаше – по законченю турниру у столним тенису, хтори у орґанизациї КПД „Карпати” почина на 10 годзин у ОШ „Петар Петрович Нєґош”. Означованє нашого швета будзе у просторийох КПД „Карпати”.
Исти дзень, на соботу, 16. януара, з вецей програми у Кули будзе Централна шветочносц означованя националного швета Руснацох у Сербиї.
На сам дзень швета, на нєдзелю, 17. януара, швето на 12 годзин будзе означене у Дюрдьове, у Ґосподїнцох на 15 г. (у просторийох Месней заєднїци), на 17 г. у Новим Орахове, а подручни канцелариї з Бикичу и Сримскей Митровици нашо швето на нєдзелю означа заєднїцки – на 17 г. у Бикичу.
У Руским Керестуре означованє националного швета Руснацох будзе на пондзелок, 18. януара у просторийох Дому култури, медзи 12 и 14 годзин, а точни час означованя швета у Керестуре будзе познати на штварток.