ДЮРДЬОВ – Дзевяте означованє националного швета Руснацох у Сербиї у Дюрдьове вчера традицийно почало з кладзеньом заставох – державней, войводянскей и Руснацох у Сербиї на будинок Месней заєднїци, Руску школу и на будинок КУД „Тарас Шевченко”, дзе з нагоди швета на 12 годзин отримана шветочна програма. Преславу орґанизовали Подручна канцелария (ПК) Националного совиту (НС) Руснацох у Дюрдьове и КУД „Тарас Шевченко”.
После гимни Сербиї и шветочней шпиванки Руснацох у Сербиї, хтори одшпивал Константин Чордаш з провадзеньом оркестру Дружтва, присутних привитал и програму водзел координатор ПК НС у Дюрдьове Мирон Сабадош, а швето повинчовали и предсидателька Совиту Месней заєднїци Дюрдьов Леона Виславки и заменїк предсидателя НС Руснацох Йовґен Мудри.
У програми участвовали Тамбурови оркестер, шпиваче Валентина Салак и Владимир Горняк одшпивали шпиванку „Дай нам Боже добри час”, писателє з Дюрдьова Владимир Кочиш и Яким Чапко пречитали свойо твори, а Яким Гарди пречитал текст о доселєню Руснацох, як и о нашим терашнїм положеню и стану у Сербиї.
Попри спомнутих, на означованю националного швета Руснацох у Дюрдьове присуствовали и дюрдьовски грекокатолїцки парох о. Яким Холошняй, директорка ОШ Мария Тртич, члени велї дружтвених орґанизацийох и гражданє Дюрдьова. По програми за шицких присутних орґанизовани коктел.