Округли стол „Костельник и ми нєшка”

автор апа
733 Опатрене

НОВИ САД – У Заводзе за културу войводянских Руснацох вчера, 15. юния, отримани округли стол з тему „Костельник и ми нєшка”, а з нагоди означованя 130-рочнїци народзеня основоположителя литератури и култури войводянских Руснацох – др Ґавриїла Костельника.

Идея була же би ше после 68 рокох од Костельниковей шмерци бешедовало о уплїву його дїла и творчосци на сучасну руску литературу, културу, язик и историоґрафию, на виучованє його дїла у школох и на други аспекти живота рускей заєднїци у Сербиї.

З тей нагоди о Костельникови як писательови бешедовал академик Юлиян Тамаш, а о його историйней роботи проф. др Янко Рамач.

Микола М. Цап, редактор „Шветлосци” и Микола Шанта, редактор Видавательней дїялносци у НВУ „Руске слово” бешедовали о проєкту видаваня вкупного дїла Гавриїла Костельника. Проєкт почал 2008. року, а дотераз вишли три томи позбераних творох Костельника, док штварти том, з назву „Роса и слунко”, у друку.

Вецей о поведзеним на округлим столє годно пречитац у новинох „Руске слово” хторе видзе 24. юния.

ПОВЯЗАНИ ТЕКСТИ