ВЕРБАС – У рамикох Медзинародней кампанї „Шеснац днї активизму процив насилства у фамелиї”, вчера у малей сали Скупштини општини (СО) Вербас отримани Округли стол „За живот без насилства”.
Предсидателька СО Вербас и єй Комисиї за родну ровноправносц Маряна Мараш визначела же Вербас приклад добрей пракси, понеже шицки компетентни институциї – Центер за социялну роботу, Дом здравя, образовни установи, Полицийна станїца, судска єдинка, явне тужительство, нєвладов сектор и Национална служба за обезпечованє роботи – добре сотрудзую.
Педаґоґ у Центре за социялну роботу мр Мая Барна Куч винєсла урядово податки же того року, по вчера, евидентовани 77 прияви насилства, цо за 10 одсто вецей як прешлого року. У тим 56 жертви насилства полнолїтни, медзи нїма 54 жени и найвецей су нєзаняти. Тиж так, гварела же у 39 случайох слово о физичним насилстве, же насилнїки найчастейше малженски партнере, та же найстарша жертва ма 87, а наймладша 2 роки.
У дискусиї участвовали и други фаховци з компетентних институцийох, а заключеня з того сходу буду основа за предкладаня формованя фонду за економску помоц жертвом насилства у Вербаше. Тиж констатоване же жертви насилства маю вше векше довириє до институцийох и вше частейше глєдаю їх помоц.
Спомнута медзинародна кампаня почала 25. новембра, на дзень Медзинародного дня борби процив насилства, а закончена є вчера, 10. децембра, на Медзинародни дзень людских правох.