НОВИ САД – Критериюми и механїзми защити убудовани до сету нових медийних законох мали би оможлївиц ефикасну приватизацию медийох чий снователь держава на рижних уровньох власци, а за успих концепту проєктного финансованя потребни активни приступ и векше анґажованє шицких актерох процесу – локалних самоуправох, медийох и цивилного сектору – поручене з Округлого столу „Медийни закони на локалним уровню”, хтори вчера у Скупштини Войводини, з потримовку Мисиї ОЕБС и Покраїнского секретарияту за културу и явне информованє, орґанизовало Нєзависне дружтво новинарох Войводини.
По словох державного секретара у Министерстве култури и информованя Саши Мирковича, 2015. рок ключни за транзицию у домашнєй медийней сфери, бо будзе закончени процес диґитализациї, по 1. юлий будзе закончена приватизациї медийох и почнє їх проєктне финансованє, медиї буду пререґистровани и почнє виробок новей Медийней стратеґиї, так же шицко то пременї медийну слику Сербиї, гварел Миркович и надпомнул же од початку 2016. року финансованє явних медийних сервисох будзе з таксох, а нє з буджету.
Представителє АП Войводини – предсидатель Скупштини Иштван Пастор и покраїнски секретар за културу и явне информованє Славиша Ґруїч, привитали сет нових медийних законох хтори дереґулую медийну сферу и зменшаю єй зависносц од буджету и политичних структурох, понеже нови закони информованє першираз дефиную як дїялносц од явного интересу, за чийо сполньованє одвитую державни орґани, односно єдинки локалней самоуправи.
Зоз становиска АП Войводини як мултинационалного штредку окреме значне же информованє припаднїкох меншинских заєднїцох на мацеринским язику дефиноване як явни интерес. У процесу приватизациї винїмок меншински медиї у Покраїни чийо сновательни права ище скорей пренєшени на национални совити.
Представителє Нєзависного дружтва новинарох Войводини на Округлим столє представели Предлог акцийного плану за розвой локалного информованя у функциї очуваня явного интересу, за хтори пилот-виглєдованє поробене у штирох войводянских општинох – Панчеве, Ковину, Канїжи и Вербаше.
З оглядом же слово о локалних штредкох з розличну структуру и специфичносцами, предкладатель ше наздава же модел мож применїц на националним уровню, кед локална самоуправа и медиї буду почитовац процедуру до хторей муши буц уключена и фахова и ширша явносц.