НОВИ САД – Союз Руснацох Українцох Сербиї мал и ма важни уплїв на пестованє идентитету и розвой Руснацох и Українцох, як и на їх повязованє з Україну – гварене вчера на округлим столє з нагоди 25-рочнїци снованя Союзу Руснацох Українцох Сербиї (кед є основани Югославиї), хтори отримани у Новим Садзе, у Заводзе за културу войводянских Руснацох.
Учашнїки наглашели значносц очуваня Союзу як охрани нашого идентитету, охабяня писаних шлїдох о активносцох, значносц анґажованя младих у дальшей роботи, стретнуцох, черанки людзох и искуствох з Україну и важносц медзисобней злоги.
Вчерайши сход почал з молитву Оче наш, хтору предводзел о. др Роман Миз, а з минуту цихосци дате почитованє покойним активистом Союзу.
На Округлим столє бешедовали предсидатель Союзу Боґдан Виславски, академик Юлиня Тамаш, о. др Роман Миз, Велимир Паплацко, Микола М. Цап, Микола Шанта, предсидатеь Националного совиту Руснацох Славко Рац, Дюра Латяк, Михайло Биндас, Йоаким Грубеня и Янко Киш.
Як поведзене, Шветочна и Виберанкова Скупштина Союзу Руснацох Українцох Сербиї будзе у септембре того року, а на концу вчерайшого округлого столу предсидатель КУД „Калїна” з Индїї Петро Закамарок з провадзеньом на ґитари одшпивал даскельо шпиванки.