УЖГОРОД (УКРАЇНА) – Прешлого тижня, у Закарпатскей обласней универзалней науковей библиотеки „Федор Потушняк” отримана промоция зборнїка материялох „Олекса Мишанич у колє сучаснїкох”.
Виданє пририхтала библиотека з нагоди 85-рочнїци од народзеня доктора филолоґийних наукох, члена-кореспондента НАН України, основоположнїка українскей школи медиєвистики, дружтвеного дїяча, лауреата Националней награди „Т. Шевченко” Олекси Васильовича Мишанича (1933-2004).
На скоро штиристо бокох у кнїжки позберани здогадованя, статї, есеї котри приказую нє лєм вецейбочну особу науковца (народзеного на Закарпатю), алє и час у котрим вон жил и творел.
О Олексови Мишаничови як чловекови, нєпревозидзеней подоби українскей науки о литератури читач дознава у поглавю „Сучаснїки о Олексови Мишаничови”. Векшина з тих здогадованьох написана специялно за тот зборнїк. Їх авторе познати литературознавци, колеґове ювиланта – Микола Жулинский, Микола Сулима, Микола Мушинка, Мария Кашуба, Валерия Смилянска, як и дакедишнї аспиранти и докторанти Олекси Мишанича, котри предлужую його роботу на полю науки по цалей України.
Попри велького числа українских авторох, у зборнїку єст и єдно число иножемних, а медзи нїма и Дюра Латяк, Михал Рамач и Микола М. Цап зоз Сербиї. Микола М. Цап, одвичательни редактор часопису „Шветлосц”, подписує библиоґрафию „Олекса Мишанич и Руснаци Югославиї/Сербиї”.