Кед през Сербию рушела перша габа миґрантох зоз Сириї и других з войну залапених державох прейґ Горґошу, Мирослав Мохнацки, нєзаняти роботнїк зоз Шиду анї нє подумал же им нєодлуа и вон будзе помагац. Єдно було патриц трапезу тих людзох прейґ телевизиї, а друге кед ше их особнє стретнє. После пременки напряму преходзеня до державох Европскей униї, кед миґрантом перша одреднїца место Мадярскей постала Горватска, миґранти рушели през шидску општину, перше прейґ преходу Товарнїк, а после прейґ Беркасова.
Мохнацки ше уж теди зочел з трапезу тих людзох, бо на самим дакедишнїм малогранїчним преходзе Беркасово-Бапска, ма винїцу и викендицу. Тот преход урядово заварти кед Република Горватска постала членїца ЕУ, а миґранти го хасновали за илеґални преход.
Помоц миґрантом такой понукли Каритас нашого Апостолского еґзархату и римокатолїцкого Сримского владичества, формовани тим за помоц миґрантом на чолє з координаторку Маґдалену Павлович, а Мирослав Мохнацки вибрани же би бул вожач комби превозки.
– Перше зме помоц ношели ґу Беркасову дзе зме ю дзелєли миґрантом. Найвецей емоциї при мнє виволує слика кед видзим жену котра на рукох трима мале дзецко, прешла далєку и напарту драгу ратуюци ше од войни и глєдаюци мир за себе и найблїзши члени фамелиї. Лєбо, мацери хтори за руку тримаю мали дзеци хтори преходзели тоту длуготирвацу драгу. Кед чловек похопи же им кельо-тельо годзен помогнуц и олєгчац им нєволю, вец ми полне шерцо же сом дакому голєм з часточки помогнул дац му фалаток хлєба, пакецик поживи лєбо средствох за гиґиєну – приповеда Мирослав Мохнацки, хтори ище як школяр бул активни у Червеним крижу.
Кед миґранти пременєли напрям преходу и почали з гайзибанскей станїци одходзиц на гайзибанох до Горватскей, и Каритасов тим ше прилагодзел новим околносцом у сотруднїцтве зоз Червеним крижом. У тей хвильки гуманитарну помоц придаваю Червеному крижу при дакедишнїм мото-готелу при Адашевцох, а по потреби кед велька налоґа миґрантох, помоц дзеля и особнє.
– У Каритасовим тиму єст вецей волонтереох зоз нашей, грекокатолїцкей, и римокатолїцкей церкви. Помоц на терховней превозки сцигує до парохийей (жупней) хижи у Ґибарцу дзе ю волонтере пакую до поєдинєчних пакецикох, так як вимагаю донаторе. Помоц ше потим склада до комбия и вец ю превожим же би була розподзелєна. Одходзим и до „Домашнєй пекари” у Шидзе дзе берем слани и сладки печива хтори тиж наменєни миґрантом – гвари Мохнацки, чий син Иґор тиж помага як волонтер.
Наш собешеднїк приповеда же вони нє маю одредзени роботни час, алє кед сцигнє помоц до Ґибарцу, одходза рихтац пакецики, а вец их транспортую до прилапного центру при Адашевцох. Без огляду чи витор, диждж або тераз уж и шнїг почал залєтовац, Каритасов тим окончує свою гуманитарну роботу и помага загроженим миґрантом.
Мирослав Мохнацки зоз сином Иґором и Каритасовим тимом