НОВИ САД – З нагоди Медзинародного дня старших особох, хтори означени вчера, Покраїнски защитнїк гражданох Анико Мушкиня Гайнрих сообщела же у Сербиї постої дискриминация старших особох, хтора очежує и онєможлївує витворйованє їх правох.
Вона спозорела же дискриминация часто почина уж у фамелиї и же ше старши особи часто жаля на занєдзбованє и злохаснованє їх правох, насампредз на право на розполаганє з маєтком и пенєжом, з хторима други члени фамелиї розполагаю без їх знаня и приставаня.
Тиж так, у сообщеню наведзене и же услуги у установох социялней защити, односно домох за старих, варирую по квалитету пре нєпостоянє специфичних и нєприменьованє постояцих предписаньох, як и прето же у Сербиї нє досц розвита система надпатраня роботи тих установох.
Наглашене и тото же ситуация окреме нєвигодна у валалских штредкох, дзе старши особи творя векшину жительства, а дзе часто нєт институцийней потримовки, лєбо вона слабо обезпечена.