КОЦУР – Вчера, 23.oктобра, Шаховски клуб Омладинєц з Коцура орґанизовал Мемориялни турнир на чесц покойним предсидательом и бавячом Клубу.
Турнир бул пошвецени Миколови Москальови, Райкови Шолайови, Дюлови Фараґови, Юлиянови Русковскому, Миколови Баратови, Славкови Боканови, Желькови Йововичови, Срболюбови Станковичови, Стевови Мандичови, Вилийови Концови, Владимирови и Юлиянови Сабодайковим и Любисавови Пауновичови.
На турнире участвовали 29 шахисти з Коцура, Руского Керестура, Кули, Вербасу, Бачкого Доброго Поля, Србобрану и Змаєва.
Бавело ше 15 минути по бавячови, седем кола, швайцарске компютерске парованє, а перше место освоєл Миливоє Васич зоз Змаєва, други бул Ґоран Попович з Коцура, а треци Божидар Малович з Бачкого Доброго Поля.