Општина вимага звекшанє трансферних средствох

автор апм
832 Опатрене

ВЕРБАС – У рамикох порядней пракси приєму општинох и городох у орґанизациї Министерства будовательства, транспорту и инфраструктури, представена и вербаска општина.

З тей нагоди проєкти локалней самоуправи хтори чекаю на реализованє, проблеми з хторима ше стретаю у каждодьновим функционованю и можлїви модели ришованя проблемох, тиму подпредсидательки Влади и министерки будовательства, транспорту и инфраструктури Зорани Михайлович презентовали предсидатель Општини др Братислав Кажич и його заменїк Милан Ґлушац.

Як после сходу гварел Ґлушац, державни орґаном представели серию проєктох за чию ше реализацию глєда потримовку и додал же представени проєкти вибудови Централного построєня за преробок одрутних водох и проблем з предлужованьом його закончованя, проєкт вибудови канализациї у населєних местох општини, проєкти реконструкциї дзепоєдних маґистралних драгох и друге.

Глушац визначел же бешедоване и о опреманю индустрийних зонох, а окреме позитивно оценєл реакциї тиму министерствох на представяню Канцелариї за енерґетски менаджмент и проєктох хтори вона витворює.

– Глєдали зме и звекшанє трансферних средствох, и тоту вимогу зме добре обгрунтовали, а проблем у тим и дакедишня оцена же зме у ґрупи добре розвитих општинох. Замодлєли зме же би ше знова оценєло розвитосц општини, алє реално, бо ше пре скорейшу оцену од нас на рижних конкурсох глєда же бизме участвовали з векшим процентом средствох, цо обєктивно нє можеме обезпечиц – заключел Ґлушац.

Представителє Општини у Министерстве сообщели же за поряднє функционованє Општини потребни ище 50 милиони динари мешачно за 6 мешаци, бо розполаганє з терашнїма 14 милионами мешачно нєотримуюце и прето з правом глєдаю звекшанє.

ПОВЯЗАНИ ТЕКСТИ