БЕОҐРАД/ЖАБЕЛЬ – Початком того тижня предсидатель Скупштини општини Жабель Радован Чолич у Беоґрадзе подписал контракт за додзельованє безповратних средствох за софинасованє мирох популацийней политики зоз представнїками Кабинету без портфеля задлуженого за демоґрафию и популацийну политику.
Вредносц контракту виноши дзевец и пол милиони динари. Тоти средства буду уложени до преширеня капацитетох Предшколскей установи „Дзецинство” за оддзелєнє „Мудра сова” у Жаблю. Дзекуюци тому проєкту будзе оправени кров, купи ше два превозни средства и опрему. Министерка без портфеля задлужена за демоґрафию и популацийну политику проф. др Славица Дюкич Деянович на подписованю контрактох гварела же осемдзешат осем локални самоуправи послали одлични проєкти и вони достали средства за їх реализацию.
Чолнїки Општини Жабель виявели же општина предлужи запровадзовац активносци и мири популацийней политики, котра допринєше звекшованю числа гражданох и злєпшаню квалитета живота як наймладшим, так и їх родичом.
На явну поволанку сцигли сто двацец три прияви з проєктами зоз исто тельо городох. Средства розподзелєни и за набавянє медицинскей опреми за ґинеколоґию и педиятрию, за превозни средства патронажней служби, за снованє або змоцньованє совитовалїщох за ваготни жени, репродуктивне здравє, школи за родичох и совитовалїща за младих, як и за купованє хижох младих малженских парох.
