КУЛА – Општина Кула у 2014. року витворела суфицит од 136 милиони 872 000 динари, понеже з цалосних планованих приходох од милиярду 92 милиони 021 000, розходи були 955 милиони 149 000 динари. Суфицит пренєшени до того року, а як потолковане на вчерайшей схадзки Скупштини општини (СО) Кула, векшином то наменски средства з висших и других жридлох финансованя и буду витворени у тим року.
Одборнїки СО Кула на вчерайшей схадзки з векшину гласох и без розправи прилапели Одлуку о закончуюцим рахунку буджету Општини Кула за 2014. рок, як и о його сполньованю, з наглашеньом же позитивну оцену о витворйованю буджету дала и єдна нєзависна ревизорска хижа.
Без розправи прилапена и звит о сполньованю буджету за перши тогорочни 6 мешаци, дзе констатоване же розходи до пол рока виношели коло 48 одсто з планованого цалосного буджету, а вон после ребалансу у априлу виноши милиярду 389 милиони 819 000 динари.
Як на схадзки гварел заменїк предсидателя Општини Кула Велибор Милоїчич, пре процедуру явних набавкох витворйованє планованих капиталних инвестицийох було спомалшенше и интензивоване є у другей половки рока, так же тераз уж тирваю дзепоєдни роботи, за даєдни почали лєбо при концу поступки явних набавкох, а за дзепоєдни тирва пририхтованє за розписованє явних набавкох. Милоїчич тиж наявел же у октобру будзе ище єден ребаланс општинского буджету.
На вчерайшей схадзки СО Кула, хтора закончена за коло годзину и пол, присуствовали 27 одборнїки, дзе лєм двоме з опозициї, а предсидателька СО Кула Снежана Мркаич одборнїкох поинформовала же основана нова Одборнїцка ґрупа Динара-Дрина-Дунай, у хторей двоме одборнїки, а предсидатель єй Александар Настич, дакедишнї одборнїк ДСС. Тиж сообщела же дакедишнї одборнїк Зєдинєних реґионох Сербиї Александар Арваї тераз будзе наступац як самостойни одборнїк.
З дньового шору зняте розпатранє Елаборату о оправданосци безплатного даваня жеми на индустрийней зони у Кули италиянскей компаниї ҐЛМ ґрупа пре, як потолковане, ускладзованє контракту, а додата точка о прилапйованю вименки Статуту Спортского центру у Червинки.
СО Кула прилапела Одлуку о здобуваню и розполаганю з маєтком и стварами у власносци Општини Кула, дала согласносци на Звит о дїлованю ЯКП „Водовод” у Червинки, на розподзельованє добитку того ЯКП, а меновала и нового предсидателя Надпатраюого одбору истого ЯКП.
Пре пременку началнїка Општинскей управи Кула, терашнї началнїк Владимир Павков постал и член Комисиї за кадрово-административни оитаня и роботни одношеня СО Кула.