НОВЕ ОРАХОВО – У Новим Орахове всоботу, 14. мая, отримана шветочносц з нагоди 70-рочнїци приселєня Руснацох до того валалу и 69-рочнїци постояня ораховского КУД „Петро Кузмяк”.
Шветочносц почала з отвераньом Етно-хижи, хтора зоднука на єдним боку намесцена так як випатрала хижа у руских, а на друим боку у мадярских обисцох, гварел з тей нагоди длугорочни ораховски активиста у култури Владимир Маґоч. Наглашел и же ше у Етно-хижи будзе чувац старину и експонати обидвох заєднїцох.
З нагоди ювилею Службу Божу у церкви Христа одкупителя служел новоораховски парох о. Владислав Рац, а шпивали и жени з Церковного хору з Коцура. Парох о. Рац здоганул же 8. септембра 1946. року у Новим Орахове була перша Служба Божа и пошвецанє фундаментох за перши 50 хижи Руснацох-доселєнцох.
Интересантне же по Служби о. Рац пошвецел моторки моторкашох-байкерой, и як гварел, гоч то у нашей заєднїци нє обичай, моторкашом котри обишли швет таки подїї нє страни, та потримал їх инициятиву.
Шветочни концерт з нагоди двох ювилейох отримани всоботу вечар у Кино-сали, на хторим присутних и госцох привитал предсидатель КУД „Петро Кузмяк” Михайло Еделински, а член Националного совиту Руснацох Саша Сабадош домашнїм пожадал же би ище велї децениї витирвали у своїм валалє. Привитни слова и винчованки з нагоди ювилейох домашнїм висловел и Боґдан Виславски спред Союзу Руснацох Українцох.
Попри домашнїх з КУД „Петро Кузмяк”, у културно-уметнїцкей програми наступели и госци з КУД „Калина” з Индїї и члени ораховского мадярского КУД „Ґраца Янош”. З моцним аплазом на бини привитани и штернацрочни млади шпивач з Бачкей Тополї Жарко Прибакович, а по концерту друженє предлужене у Руским доме.