КУЛА – У просторийох Руского КУД „Др Гавриїл Костельник” вчера основани Орґанизацийни одбор за Централну преславу Националного швета Руснацох, хтора 16. януара 2016. року будзе у Кули.
На чолє Орґанизацийного одбору директор главного финансиєра Централней преслави – Заводу за културу войводянских Руснацох Серґей Тамаш, а подпредсидателє заменїк предсидателя Националного совиту Руснацох Йовґен Мудри и предсидатель кулского Дружтва Владимир Бучко.
На вчерайшей схадзки начално бешедоване о главней и провадзацих програмох означованя швета, та предложене же би за тоту нагоду була публикована окремна моноґрафия о Руснацох у Кули, за цо будзе задлужени Александер Мудри. Бешедоване и о можлївих виставох на Централней преслави и предложене же би то були вистави подобових роботох кулских авторкох Амалиї Ковач и Лидиї Барна, роботох Здруженя женох „Идея” з Кули, як и вистава старих фотоґрафийох и других документох хтори маю Руснаци у Кули.
Праве пре пририхтованє тей вистави и моноґрафиї, шицки Кулянци котри маю даяки стари фотоґрафиї, документи, кнїжки и подобне, най ше явя предсидательови кулского КУД Владимирови Бучкови, на телефони (025)720-727, лєбо 063/819-80-85.
Члени Орґанизацийного одбору, у хторим и представитель Општини Кула и хтори будзе преширйовани з особами задлуженима за одредзени сеґменти програми, вчера бешедовали и о уключованє нашей церкви у Кули до програми, о вирабяню лоґа и сценоґрафиї преслави у Кули, як и о дзепоєдних можлївих музичних и бешедних точкох програмох, хтори предложели домашнї.
Шветочносц у Кули будзе пошвецена и 20-рочнїци снованя Руского КУД „Др Гавриїл Костельник”, понеже є урядово основани 3. фебруара 1996. року. Шлїдуюца схадзка Орґанизацийного одбору ма буц отримана о мешац.