КУЛА – Початком того тижня, 5. януара, у просторийох Руского КУД „Др Гавриїл Костельник” отримана схадзка Орґанизацийного одбору за Централну шветочносц означованя националного швета Руснацох, хтора 16. януара будзе у Кули.
На схадзки бешедоване о финализованю планованих програмних активносцох за Централну шветочносц и їх технїчних детальох, а пред схадзку Орґанизацийного одбору, його представителє о Централней шветочносци нашого швета ище раз бешедовали и з чолнїками Општини Кула.
Централна шветочносц националного швета Руснацох 16. януара (собота) у Кули почнє зоз шаховским турниром на 13 г. у просторийох кулского Руского КУД, а на 15,30 г. будзе промоция моноґрафиї о Руснацох у Кули, у шветочней сали Школи за основне музичне образованє.
У просторийох парохиї грекокатолїцкей церкви у Кули на 16,30 г. будзе отворена вистава иконох о. Йосафата Гардия, а на 17 г. у церкви и Благодарна Архиєрейска Служба Божа.
Вистава подобових роботох Лидиї Барновей будзе отворена на 18.30 г. у Ґалериї Културного центру, а на 19 г. вистава подобових роботох Амалиї Ковач у голу Културного центру, дзе будзе и етно-стол.
Шветочна академия у велькей сали Културного центру почнє на 20 г., а коктел за учашнїкох и госцох на 21,30 г. у сали Мадярского културного центру „Непкер”.