КОЦУР – Члени Месней орґанизациї (МО) инвалидних и других пензионерох з Коцура всоботу, 28. новембра, шветочно отворели свойо нови просториї. На отвераню присуствовали шицки котри помогли у реновированю просторийох, та донаторе, а пантлїку прештригнул народни посланїк Момо Чолакович з Вербасу.
Попри Чолаковича, котри, як за Рутенпрес гварела предсидателька МО Андя Хромиш, найвецей допринєсол же би нєшка були у нових просторийох, на отвераню були и представителє Партиї зєдинєних пензионерох Сербиї з републичного и општинского уровню, предсидатель Месней заєднїци Коцур Желько Бєлан, членїца Општинскей ради Вербас задлужена за роботу з меснима заєднїцами Йована Вуйтович, та представителє грекокатолїцкей и православней церкви у Коцуре.
Предсидателька Андя Хромиш шицим присутним подзековала на нєсебичней помоци при ушорйованю просторийох, окреме донатором, медзи котрима и Коцурци котри давали пенєжни прилоги же би ше купело просториї терашнього Дому.
Простор за тераз ушорени лєм знука, а нарок плановане закончиц фасаду и присподобиц пиньвицу, хтора наменєна за сходзенє младежи.
Члени МО пензионерох свою активносц тераз уж окончую у нових просторийох.