НОВИ САД – Всоботу, 14. мая, у Новим Садзе отворени 83. Медзинародни польопривредни саям, на хторим ше за седем днї представяю коло 1 500 викладателє, цо за 10 одсто вецей як влонї. Як и предходни роки, на Сайме мож опатриц сучасни польопривредни машини, механїзацию, алат, саднїци, при велїх фирмох ше розпитац о кредитох за польопривреднїкох и подобне. Орґанизовани и числени културно- уметнїцки змисти, фахово преподаваня о польопривредней продукциї и можлївосцох сотруднїцтва Сербиї з другима державами.
Того року Манифестация ма вельки одгук, медзи иншим и прето же ю урядово отворел предсидатель Сербиї Томислав Николич. Вон визначел же Польопривредни саям и у найгорших часох доприношел Сербиї на способ же ше прейґ нього дознавало о нових технолоґийох и уводзело ше их до процесох продукциї. Ґу тому, Саям роками промовує Сербию и єй потенцияли, та є прето за нашу державу найзначнєйша привредна манифестация.
На отвераню були и министерка польопривреди и защити животного штредку Снежана Боґосавлєвич Бошкович, министер привреди Желько Сертич, городоначалнїк Нового Саду Милош Вучевич, амбасадор Италиї у Беоґрадзе Дюзепе Манцо, та други министрове и дипломати зоз Сербиї и иножемства.
Того року жем-партнер Италия, та ше на Польопривредним сайме представяю 16 подприємства и коло 50 привреднїки з тей держави. Амбасадор Манцо гварел же Италия уж сотрудзує зоз Сербию у автомобилскей и текстилней индустриї, банкарским секторе, а убудуце приоритет будзе отверанє нових роботних местох и розвой привреди.
Медзинародни польопривредни саям тирва по пияток, 20. май, а цени уходнїцох исти як и влонї – 200 динари за дзеци, 500 динари за одроснути и 350 динари за колективни нащиви.
Покровителє Сайму Министерство польопривреди и защити животного штредку, „Дженерали осиґуранє”, Институт за польодїлство и заградкарство и „Аґропанонка”.
