ШИД – У Руским доме у Шидзе всоботу, 27. фебруара, отримана порядна Рочна скупштина Рускей Матки (РМ) на хторей предсидатель РМ Дюра Папуґа поднєсол Звит о роботи Матки у 2015. року, а тиж поднєшени и звити о роботи Реґионалного одбору за Срим, Городского одбору у Новим Садзе як и месних одборох у Руским Керестуре и Коцуре, та звит о роботи Форуму младих РМ, хтори Скупштина потим и прилапела.
Папуґа поднєсол и Финансийни звит за прешли рок, у хторим констатоване же РМ рок закончела позитивно.
План роботи РМ за 2016. рок представел заменїк предсидателя Матки Миломир Шайтош, а потим представени и плани роботи Реґионалного, Городского и месних одборох РМ. Матка и надалєй будзе орґанизовац свойо дотерашнї манифестациї и програми, алє и нови, а єдна з нїх будзе фестивал русинского филму „Русин филм фест”, хтори би мал буц першираз отримани на єшень того року у Шидзе. На Скупштини заключене и же єден з важних задаткох омасовиц РМ, насампредз з младима, прейґ Форуму младих РМ.
Предсидатель Папуґа поинформовал Скупштину и о заєднїцких активносцох Рускей з матками Бунєвцох, Словацох и Матицу сербску и наявел сход спомнутих маткох 10. марца у Матици сербскей у Новим Садзе.
Скупштина поинформована и о трецим зашеданю Шветовей ради РРЛ, хторе будзе перши викенд у марцу у Деви, у Румуниї, дзе 3. марца будзе означени и Дзень Русинох Румуниї.
