НОВИ САД – У просторийох Екуменскей гуманитарней орґанизациї (ЕГО), у Новим Садзе вчера отримана промоция кнїжки о. др Романа Миза „Християнство – драги и девияциї – лексикон церковних и вирских заєднїцох, шлїдбох и єресох”, цо уж седемдзешат седма кнїжка о. Миза.
Шветочносц украшел Хор „Гармония”, з дириґентку Весну Кесич Крсманович и солистами Ану Римар и Милошом Ристичом, а на промоциї кнїжки присуствовал и наш апостолски еґзарх, владика Георгий Джуджар.
Присутних привитал предсидатель Скупштини ЕГО др Микола Новта, котри обрацел увагу на тото же здравє то социялни, духовни и материялни благостан, а нє лєм одсуство хороти, а модераторка програми була редакторка кнїжки Марияна Айзенкол.
У найновшей кнїжки о. др Романа Миза обробени коло 1 800 вирски заєднїци, на скоро 700 бокох, а о капиталним значеню нового дїла бешедовали видаватель Драґан Стойкович и публициста Марко Дюрич, обидвоме з Беоґраду, директор ЕГО Владислав Ивичиак, а о своїх искуствох з о. Мизом у упознаваню вирских заєднїцох бешедовал Яким Грубеня.
Презентуюци лєм виривки зоз свойого енциклопедийного знаня о вирских заєднїцох, о. Роман Миз заключел же тота його робота доприношєнє екуменизму и лєпшому медзисобному упознаваню, а циль нам, як гварел – Господ Исус Христос.
Софинансиєр кнїжки ЕГО, прейґ свойого проєкту Школа екуменизму.