КОЦУР – У рамикох проєкту ушорйованя желєних поверхносцох у општини Вербас, Еколоґийни рух и Коцурске здруженє младих вчера на побрежю беґелю Дунай-Тиса-Дунай орґанизовало роботну акцию.
На акциї ушорени простор коло одпочивалїща, офарбени лавки, покошена трава, позберане шмеце, а очисцене и офарбене и пристанїще за чамци. Ґу тром каменим столом, хтори поставени влєце, вчера додати ище три таки столи и лавки.
На роботней акциї участвовали и школяре коцурскей Основней школи „Братство єдинство”, котри члени Еколоґийней секциї.
Попри числених спонзорох, тот проєкт препознало и Министерство будовательства, транспорту и инфраструктури, а ношителє проєкту прешвечени же праве таки места як тото у Коцуре маю вельки туристични потенциял пре навтичарох, котри часто преходза по беґелю.