КОЦУР – Члени Културно-просвитного дружтва „ДОК” вчера вечар у Колошняйовей сали у Коцуре отримали порядну Рочну скупштину, на хторей анализовани активносци Дружтва у прешлим року и принєшени план и програма роботи за 2016. рок. Скупштину водзела Мария Горняк.
Медзи иншим, як найзначнєйши проєкти у прешлим року „ДОК”-у визначене орґанизованє дзешатей, ювилейней „Коцурскей чутки”, та друкованє моноґрафиї коцурскей грекокатолїцкей церкви „Чувар вири, язика и руского народу”.
Як у виношеню финансийного звиту спред Надпатраюцого одбору визначел Кирил Кередярто, Дружтво до Националного совиту Руснацох на три заводи посилало вимоги за финансийни средства и на шицки три заводи достати неґативни одвит, пре нєпознати причини.
На Скупштини одлучене и о темох за конкурси „ДОК”-у 2016. року, та за литературни конкурс на наступней „Коцурскей чутки” тема будзе „Забранєне куренє”, а з исту тему ше годно приявиц и на еколоґийни конкурс, хтори будзе розписани з нагоди Дня планети Жеми.
У тим року буду предлужени порядни активносци и орґанизованє фестивалох и манифестацийох КПД „ДОК”, а увага будзе пошвецена и означованю 240-рочнїци осамостойованя грекокатолїцкей церкви у Коцуре. На Скупштини бешедоване и о финализованю гуманитарней акциї з хтору збудована хижа за фамелию Чижмар, котрей обисце страдало у огню, та о видаваню дзецинского роману „Кеша” Владимира Сабо-Дайка, як єдного з трох рукописох хтори Здруженє планує видац у тим року.
На схадзки представене и 19. число часопису „Ерато над Коцуром”, як и мурови календар КПД „ДОК”.