МИКЛОШЕВЦИ – Прешлей соботи отримана звитна Рочна схадзка хторей попри членох Дружтва „Нашо дзеци”зоз Миклошевцох, присуствовали началнїк Општини Томповци Томислав Паненич и його заменїкове Мирослав Лїкар и Здравко Звонарич.
На схадзки предсидателька Мария Папуґа поднєсла звит о роботи у прешлим року у хторим наглашела же зоз посцигнутим треба же би були шицки задовольни, а успихи би були ище обачлївши кед би у валалє було вецей дзеци.
През рок орґанизовани вецей роботнї з нагоди Крачуна и Велькей ноци, а Дружтво участвовало на Сайму ручних роботох, орґанизовали маскенбал и инше. На схадзки поднєшени и финансийни, як и звит Надпатраюцого одбора хтори єдногласно прилапени.
На концу схадзки прилапени план роботи за наступаюци период хтори ше нє будзе барз розликовац од потерашнїх, алє началнїк Паненич предложел же би ше орґанизовало єднодньови вилєт родичох и дзецох чию орґанизацию помогнє општина.
После схадзки дзеци виведли програму пошвецену Дню мацерох хтору зоз дзецми пририхтала водителька Леся Мудри.