НОВИ САД – Всоботу, 7. новембра, у просторийох новосадскей парохиї отримана Рочна и Виберанкова схадзка Союзу Руснацох Українцох Сербиї. Звит о роботи винєсол предсидатель Союзу Боґдан Виславски, котри на тей схадзки достал и нови мандат за тоту функцию.
На схадзки вибрани и Управни одбор, Надпатраюци одбор, секретаре и одбори за информованє, културу и младеж. За подпредсидательох меновани Велимир Паплацко и Петро Закамарок, а за секретарох Янко Киш, Тарас Чапко и Славица Стефанович.
Предсидатель Союзу Боґдан Виславски визначел же Союз Руснацох Українцох ма добре сотруднїцтво з Националним Совитом Руснацох, Амбасаду України, грекокатолїцку церкву, локалнима самоуправами, як и з другима институциями и орґанизациями цо, як гварел, барз значне, понеже Союз розполага зоз скромнима финансийнима средствами.
У своїм звиту Виславски наведол и прешлорочни фестивали на хторих, у сотруднїцтве зоз Союзом Руснацох Українцох участвовали, лєбо нащивели нашо КУД, а на схадзки бешедоване и о збогацованю змисту веб-сайту Союзу.
Подпредсидатель Союзу Велимир Паплацко бешедовал о уключованю младих до членства и визначел же Руснаци и Українци вєдно можу вецей посцигнуц, як и же таки приступ може буц лєм на хасен и єдних и других.
Того року ше наполнює 25-рочнїца снованя Союзу Руснацох Українцох, а ювилей будзе означени до конца рока.