ВЕРБАС – У просторийох КПД „Карпати” вчера отримана рочна Скупштина Спортских бавискох (СБ) „Яша Баков”, на хторей у Звиту винєшене же у рамикох 23. Бавискох того року отримани змаганя у кошарки, шаху за сениорох и пионирох, у вельким фодбалє за сениорох, малим фодбалє за ветеранох, у одбойки на писку, змаганя у лапаню риби на дуґов, у ґуґланю и штреляцтве, у пикаду и у столним тенису. Змаганя були у Дюрдьове, Руским Керестуре, Суботици, Коцуре и у Вербаше.
Звит поднєсол предсидатель СБ „Яша Баков” Звонко Салаґ, котри замерковал же, у поровнаню з прешлорочнима Бависками, гоч нє отримани два екипни змаганя – у вельким фодбалє за пионирох и у одбойки, число змагательох того року було менше лєм за двох учашнїкох, бо на шицких тогорочних змаганьох участвовали 317 змагателє з наших местох.
Подпредсидатель СБ Иван Папуґа винєсол финансийни звит за 2014. рок, дзе приходи були прейґ 165 000 динари, а Бависка буду дїловац позитивно, бо после виплацованя шицких трошкох, за идуци рок останє коло 20 000 динари.
На Скупштини бешедоване и о планє змаганьох у идуцим року. За даєдни змаганя уж познате дзе и кеди буду, а за дзепоєдни места и термини отримованя буду утвердзени познєйше.
О финансийним планє за наступни, 24. Спортски бависка, подобнєйше будзе бешеди после приношеня финансийного плану Националного совиту, хтори єдине жридло финансованя Бавискох.
На Скупштини присуствовали представителє КУД и спортских дружтвох зоз Суботици, Коцура, Дюрдьова, Руского Керестура, Шиду и з Вербасу.