НОВИ САД – Вчера у просторийох Заводу за културу войводянских Руснацох у Новим Садзе, отримана схадзка Орґанизацийного одбору Националного швета Руснацох на хторей окончена евалуация, насампредз Централней шветочносци, преноши Руска редакция Радио-телевизия Войводини.
И попри краткого часу у хторим є пририхтована, и дилемох дзе будзе отримана, Централна преслава з нагоди Националного швета Руснацох хтора 19. януара була у Руским Керестуре затримала високи уровень квалитету у змистовим, алє и у шицких других – технїчних, просторних и визуалних аспектох яки така програма подрозумює.
То заключенє шицких членох Орґанизацийного одбору хтори були на вчерайшей схадзки, на хторей розпатрани и даєдни зауваги, насампредз протоколарного и технїчного характеру. На истей схадзки догварене и же би ше Управному одбору Заводу и Националному совиту препоручело же би убудуце централни шветочносци були отримовани у Новим Садзе, з тим же би кажди рок акцент програми бул на даєдним месце дзе жию Руснаци.