РУСКИ КЕРЕСТУР – У Руским Керестуре вчера, 1. децембра отримана порядна схадзка Совиту Месней заєднїци (МЗ), на хторей прилапени менши вименки финансийного плану МЗ после ребалансу буджету Општини Кула, а хтори ше одноша на роботу Служби МЗ.
Як гварел предсидатель Совиту МЗ Владимир Олеяр, на основи заключеня Совиту з прешлей схадзки о нєзадовольстве з мало тогорочнима инвестицийнима роботами у Керестуре, о тим бешедовал з чолнїками Општини Кула и догварене же лєбо ище до конца того, лєбо на яр идуцого року, з новим асфалтом будзе прелята „заєднїцка” калдерма на Новим населєню, як и у єдней улїци у тей часци валалу, а у планє и чисценє яркох.
Як гварел Олеяр, найвироятнєйше же нови месни самдопринос у Керестуре нє будзе розписани, алє пенєж зоз самодоприносу Керестурцом останє на розполаганю, а тераз єст 10 милиони 600 000 динари.
На вчерайшей схадзки догварене же традицийна преширена Рочна схадзка Совиту МЗ на концу рока будзе 30. децембра у шветочней сали Спортскей гали, на хтору, як то узвичаєне, буду поволани представителє керестурских установох, институцийох, здруженьох и привреднїки.
Понеже дзепоєдни члени Совиту МЗ уж длугши час нє приходза на схадзки, роздумоване же би ше до Статуту унєсло каребну миру виключованя зоз Совиту пре нєактивносц. Медзитим, после консултованьох з правнїками, утвердзене же за тото нєт законскей основи, понеже ше и членох совитох МЗ-ох вибера на нєпоштредних виберанкох и вибраним особом нє мож „вжац” мандат. Єдина „морална” можлївосц же би ше нєактивних членох явно преволало, а на вчерайшей схадзки надпомнуте же у предходним чаше даскельо схадзки Совиту МЗ отримани на гранїци кворуму.
На вимогу Здруженя младих Руского Керестура „Пакт Рутенорум” же би ше им за роботу уступело Дом младежи, Совит одлучел же до Општини Кула, понеже Дом тераз у єй власносци, пошлє вимогу же би младим уступела Дом на хаснованє за їх активносци, з наглашеньом же за тото „Пакт Рутенорум” ма потримовку Совиту МЗ.
Тиж заключене же за кошаркашски терен на Новим населєню буду купени нови, место терашнїх дотривалих кошох, як и же ше до центру валалу постави векшу огласну таблу.
