Отримана схадзка СО Жабель

автор бас
829 Опатрене

ЖАБЕЛЬ – На 27. схадзки Скупштини општини (СО) Жабель, отриманей пияток, 6. новембра, место члена Општинскей ради Йована Йовановича з Демократскей странки (ДС), котри дал задзекованє, за члена Ради з тайним гласаньом вибрани Милош Ковачев, тиж з ДС.

СО прилапела звити о роботи за прешли школски рок єдиней штреднєй школи у општини, штирох основних и двох предшколских установох, як и їх плани и програми роботи за тот школски рок. Дата согласносц на План роботи Дому здравя Жабель за 2015. рок, а принєшена и Одлука о вименки Статуту Туристичней орґанизациї Општини, пре усоглашованє з одредбами Закона о туризму.

Локални парламент прилапел и Одлуку о вименкох и дополнєньох Одлуки о функционованю орґанох општини, та о надополнєньох и других приманьох вибраних, менованих и поставених особох, одборнїкох и членох роботних целох Скупштини општини.

Менованє Општинскей виберанковей комисиї у стаємним составе, перше розришованє, а потим и менованє нових членох Школского одбору ОШ „Йован Йованович Змай” у Дюрдьове, та надополнєня за роботу дочасових орґанох у Явней установи „Спортски обєкти”, тиж були єдни з точкох дньового шору на 27. схадзки  СО Жабель.

Остатня точка були питаня одборнїкох, медзи нїма о подлих драгох у општини, та о вельким числу псох блукачох. На ободва питаня одвитовал предсидатель Општини Чедомир Божич, дзе гварел же у шицких населєних местох тирва керпенє векших дзирох на драгох, як и же азил за пси у општини пополнєти, а до жабелького приходза и пси з других општинох. Божич спомнул и же Општина видвоює барз вельки средства за тужби жительох пре кусаня псох на улїци.

3-Zabelj-02

ПОВЯЗАНИ ТЕКСТИ