ВЕРБАС – Вчера у просторийох КПД „Карпати” у Вербаше отримана схадзка Управного одбору (УО) Рускей матки (РМ) на хторей анализовани актуални стан у славянских маткох у АП Войводини, а после презентованя проблемох о статусу и почежкосцох у финансованю їх роботи хтори явно винєшени 10. марца на роботним стретнуцу у Матици Сербскей у Новим Садзе. Предсидатель РМ Дюра Папуґа, медзи иншим, визначел же без огляду же на тим стретнуцу винєшени числени проблеми и питаня з хторима ше стретаю войводянски матки, на нїх ище нє достати нїяки одвити.
На УО звит о роботи вербаского Месного одбору (МО) РМ за прешли и план роботи за тот рок винєсол предсидатель МО др Деян Загорянски, котри гварел же пре барз чежки финансийни стан активносци Одбору досц ощербени, алє Одбор вше порихтани привитац госцуюци промоциї, представи, лєбо други програми хтори орґанизую други месни одбори.
На схадзки одлучене же кандидат РМ за доставанє тогорочней Награди Шветовей ради Русинох/Руснацох/Лемкох „Василь Турок Гетеш” будзе подобови уметнїк Владимир Няради з Вербасу.
![5-RM-02[1]](https://www.ruskeslovo.com/wp-content/uploads/2016/04/5-RM-021.jpg)